Tħawwil ta’ siġar fil-Masġar ta’ San Anard

Wara li tlestiet il-fażi ta’ tindif f’parti mill-masġar ta’ San Anard, ingħata l-bidu ta’ tħawwil ta’ siġar u arbuxelli f’ Ġunju 2021. F’attivita’ b’rabta ma’ Jum l-Ambjent 21 tħawwlu mitejn siġra, fil-preżenza tal-Ministru Miriam Dalli. L-ispeċi li twaħħlu huma tal-ħarrub (Ceratonia siliqua), ballut (Quercus ilex), alaternu (Rhamnus alaternus), deru (Pistacia lentiscus) u żnuber (Pinus halepensis. Din kienet fażi oħra fil-proċess kontinwu ta’ restawr ekoloġiku ta’ dan il-masġar, li kien ilu mitluq għal kważi ħamsin sena. Il-proċessi mit-twaqqif tal-Park Nazzjonali fl-2016 kienu studju xjentifiku minn botanista ewlieni tal-istat tal-masġar, l-ispeċi indiġeni u aljeni invażivi fih, l-imkejjen preċiżi fejn kien hemm munżelli ta’ terrapien, strutturi u skart muniċipali, kif ukoll il-metodu ta’ kif għandu jibda r-restawr ekoloġiku. Wara li dan l-istudju ġie approvat mill-ERA, bdew jiġu implimentati l-miżuri, li kienu jinkludu t-tneħħija bi pjan metodiku tal-iskart (fil-parti l-kbira ħġieġ, plastik u ħadid li ġew irriċiklati. Wara bl-użu ta’ inġenji apposta tneħħew mill-masġar ta’ madwar tlett mija u tletin tunnellata ta’ skart tal-kostruzzjoni. Siġar li kien ilhom mejtin ħafna snin bdew jitħaxxilfu u minflokhom bdew jitħawwlu siġar indiġeni. Dawn jiġu msaqqija regolarment minn Parks Malta.

Fil-Ħarifa li ġejja se jitkompla l-proċess ta’ tħawwil ta’ siġar fil-masġar. Bħalissa qed issir it-tħejjija għal din l-attivita’.